അക്കായി: പഴ വർഗങ്ങളിലെ പുതുമുഖം

പഴ വർഗങ്ങളിലെ പുതുമുഖമാണ് അക്കായി. അരിക്കേസി സസ്യകുടുംബാംഗമായ ഈ ഉഷ്ണമേഖലാ വിള കാഴ്ചയിൽ കവുങ്ങുപോലെയാണ്. പ്രോട്ടീൻ കലവറയായ  അക്കായിയുടെ  100 ഗ്രാം പൊടിയിൽ 533.9 കലോറി ഊർജം അടങ്ങിയിട്ടുണ്ട്. ധാരാളം പോഷകങ്ങൾ പഴത്തിലും ഇതിൻ്റെ മൂല്യവർധിത ഉൽപ്പന്നങ്ങളിലും അടങ്ങിയിട്ടുണ്ട്. വിറ്റമിനുകൾ, കാത്സ്യം, കാർബോഹൈഡ്രേറ്റ് തുടങ്ങി അനേകം പോഷകമൂലകങ്ങളുള്ള ഫലമാണ്  അക്കായി. കൂടാതെ എൽഡി കൊളസ്ട്രോൾ കുറയ്ക്കുന്നതിനും ട്യൂമർ, കാൻസർ എന്നിവ പ്രതിരോധിക്കുന്നതിനും ഇത് സഹായിക്കുന്നു.

നല്ല സൂര്യപ്രകാശവും നീർവാർച്ചയും’ ജൈവസമ്പന്നവുമായ മണ്ണിൽ ഈ ചെടി നന്നായി വളരും. രണ്ടടി ആഴം, വീതി, നീളത്തിൽ കുഴികളെടുത്ത് ചാണകവും, കമ്പോസ്റ്റും, മേൽമണ്ണം ചേർത്ത് കുഴികൾ മൂടിയശേഷം തൈ നടാം.’ വിത്തുകൾ മുളപ്പിച്ച തൈകളാണ് സാധാരണയായി നടീലിന് ഉപയോഗിക്കുന്നത്. കാറ്റത്ത്ആടി ഉലയാതിരിക്കാൻ കമ്പ്നാട്ടി ചെടി കെട്ടിവയ്ക്കണം വേനലിൽ ജലസേചനവും മറ്റ് പരിചരണമുറകളും കൃത്യമായി ചെയ്യണം.നന്നായി പരിപാലിക്കപ്പെട്ടാൽ നാലാം വർഷം കായ്ക്കും.വർഷം മുഴുവൻ കായ്ക്കുമെങ്കിലും മഴക്കാലം വിളവെടുപ്പിന് അനുയോജ്യമല്ല. ജനുവരിമുതൽ ജൂൺവരെയും, ആഗസ്ത്മുതൽ ഡിസംബർവരെയും വിളവെടുക്കാം. 25 മീറ്റർവരെ ഉയരത്തിലെത്തുന്ന ഈ പനവർഗത്തിൻ്റെ ശാഖകളും ശിഖരങ്ങളും മൂന്നുമീറ്റർവരെ വ്യാപിച്ചുകിടക്കും.

അക്കായി ബെറി എന്നറിയപ്പെടുന്ന കറുത്ത മുന്തിരിപോലുള്ള  ഇതിൻ്റെ കായ്കൾ ഒരുകുലയിൽ 500 മുതൽ 800 വരെ എണ്ണം ഉണ്ടാകും. ഇവ നേരിട്ട് കഴിക്കുകയോ മൂല്യവർധിത ഉൽപ്പന്നങ്ങളും ഉണ്ടാക്കാൻ ഉപയോഗിക്കുകയോ ചെയ്യാം.മൂല്യവർധിത ഉൽപ്പന്നമായ അക്കായി ഓയിലിന് വിപണിയിൽ ധാരാളം ആവശ്യക്കാരുണ്ട്.