ചണ്ണക്കൂവ നടാൻ ഒരുങ്ങുമ്പോൾ ചെയ്യേണ്ട കാര്യങ്ങൾ

ചണ്ണക്കൂവ നടാൻ ഏപ്രിൽ മാസമാണ് നല്ലത്. മഴയ്ക്കു മുൻപ് നട്ട്, “വിത്ത്കാഞ്ഞ്' പൊടിക്കണമെന്നാണ് പ്രമാണം. ചണ്ണക്കുവയ്ക്കു വേണ്ടി ആഴത്തിൽ കിളച്ച് കട്ടകളുടച്ച് ഭൂമിയിൽ ഒരുമീറ്റർ വീതിയിൽ ആവശ്യാനുസരണം നീളത്തിൽ താവരണകൾ തയാറാക്കുന്നു. ഈ താവരണകളിൽ നടുവിലായി നെടുകേ വരിയായി ഒരു മീറ്റർ അകലത്തിൽ ചെറു തടങ്ങൾ തയാറാക്കി, ഓരോ തടത്തിലും 2 കിലോ വീതം ഉണങ്ങിയ കാലിവളവും ചാരവും ചേർത്ത മിശ്രിതം മേൽമണ്ണുമായി ഇളക്കി ചേർക്കണം.

രണ്ടു താവരണ തമ്മിൽ അര മീറ്റർ ഇടച്ചാൽ വേണം. ചുരുക്കത്തിൽ രണ്ടു തടത്തിലെ വരികൾ തമ്മിൽ ഒന്നര മീറ്ററും ചെടികൾ തമ്മിൽ ഒരു മീറ്ററും അകലം നൽകണം. നടീൽ വസ്‌തുവിന് ചുരുങ്ങിയത് 15 ഗ്രാം ഭാരമുണ്ടായിരിക്കണം. വിത്തിൻ്റെ കഷണത്തിൽ വളരാൻ കഴിവുള്ള ഒന്നോ അതിലധികമോ മുകുളക്കണ്ണുകളും വേണം.

മുകുളങ്ങൾ മേലേയ്ക്ക് തിരിച്ചാണ് നടേണ്ടത്. നടീൽ താഴ്‌ച ഏറിയാൽ 5 സെ.മീറ്റർ ആയി ക്രമീകരിക്കണം. നടീലിനു ശേഷം ഒരു പലക കൊണ്ട് നേരിയ തോതിൽ മേൽമണ്ണ് അമർത്തുക. വിത്തു മുളയ്ക്കാൻ വേണ്ട നനവ് നിലനിർത്തണം.

ഒപ്പം കരിയില കൊണ്ട് കുഴികളിൽ പുതയിടണം. മുളച്ച് ഒരു മാസത്തിനു ശേഷം കളപറിച്ച് മണ്ണ് കൂട്ടുക. ജലനിർഗമനം സർവ പ്രധാനം ഒപ്പം സൂര്യപ്രകാശവും.

വിളവെടുപ്പ്

ചിരസ്ഥായി ഔഷധിയാണിത്. വീട്ടുവളപ്പിൽ 7 മാസത്തിനു ശേഷം ആവശ്യാനുസരണം കിഴങ്ങ് മാന്തി എടുക്കാം. 240 ദിവസങ്ങൾക്കു ശേഷം മൊത്തമായി കിളച്ച് വിത്തിനു വേണ്ട പ്രകന്ദം മാറ്റി വച്ച ശേഷം ആവർത്തന കൃഷി നടത്താം. പ്രകന്ദം പച്ചയ്ക്കും ഉണക്കിയും വിൽക്കാം. തികച്ചും മഴയെ മാത്രം ആശ്രയിച്ചുള്ള കൃഷി.