വിത്തുത്പ്പാദനം
-
സര്‍ക്കാര്‍ ഫാമുകളില്‍ നിന്നോ അംഗീകൃത വിത്തുത്പ്പാദകരില്‍ നിന്നോ വാങ്ങിയ വിത്ത് മാത്രമെ പുതിയ വിത്തുത്പ്പാദനത്തിന് ഉപയോഗിക്കാവൂ
-
വിത്തുത്പ്പാദനത്തിനുള്ള കൃഷിസ്ഥലത്ത് മുന്‍പ് കൃഷി ചെയ്തിരുന്ന ഇനത്തിന്റെ തൈകള്‍ ഉണ്ടായിരിക്കാന്‍ പാടില്ല
-
ജനിതക ശുദ്ധി ഉറപ്പുവരുത്തുന്നതിന് വിത്തുത്പ്പാദനത്തിനുള്ള പാടങ്ങള്‍ക്ക് മറ്റിനങ്ങളില്‍ നിന്നും ചുരുങ്ങിയത് മൂന്ന് മീറ്റര്‍ അകലമെങ്കിലും കൊടുക്കണം. വിത്തിന്റെ തനിമ നഷ്ടപ്പെടാതിരിക്കാന്‍ ഇത് സഹായിക്കും. അതല്ലെങ്കില്‍ വിത്തിനുവേണ്ടി കൊയ്യുമ്പോള്‍ പാടത്തിന്റെ എല്ലാ ഭാഗത്തുനിന്നും മൂന്നുമീറ്റര്‍ വീതം ഒഴിവാക്കണം
-
രോഗം ബാധിച്ച ചെടികളും കളകളും കലര്‍പ്പുകളും നീക്കം ചെയ്യണം
-
വരിവരിയായി നടുന്നത് കലര്‍പ്പ് നീക്കം ചെയ്യുന്നതിന് സഹായിക്കും. ഓരോ മൂന്നുമീറ്ററിന് ശേഷവും 30 സെന്റീമീറ്റര്‍ ഇടയകലം നല്‍കുന്നത് സസ്യസംരക്ഷണ പ്രവര്‍ത്തനങ്ങള്‍ക്കും വളപ്രയോഗത്തിനും മറ്റും സൗകര്യം നല്‍കും
-
കൊയ്ത്തിന് ഒരാഴ്ച മുന്‍പെങ്കിലും വയലിലെ വെള്ളം വാര്‍ത്തുകളയുന്നത് എല്ലാ ചെടികളും ഒരുപോലെ മൂപ്പെത്തുന്നതിന് സഹായിക്കും. ഒരു നെല്‍ക്കതിരിലെ 80 ശതമാനം മണികള്‍ മൂപ്പെത്തിയാല്‍ കൊയ്യാം. വേനല്‍ക്കാലത്ത് പാലുറയ്ക്കുന്നതുമുതല്‍ മൂപ്പെത്തുന്നതുവരെ നെല്ലിന് ആവശ്യത്തിന് വെളളം കിട്ടുന്നുണ്ടെന്ന് ഉറപ്പുവരുത്തണം
-
കൊയ്ത അന്നുതന്നെ കറ്റ മെതിച്ചെടുക്കണം.വിത്ത് നല്ലവണ്ണം ഉണക്കണം. ഈര്‍പ്പം 13 ശതമാനത്തിലും കൂടുതലാകാതിരിക്കാന്‍ ശ്രദ്ധിക്കണം. വിത്ത് കൂടുതല്‍ ഉണങ്ങിയാല്‍ അതിന്റെ ജീവനക്ഷമത കുറയും എന്നതുകൊണ്ട് വേനല്‍ക്കാലത്ത് വിത്ത് കൂടുതല്‍ ഉണക്കരുത്. പ്രത്യേകിച്ചു ഹ്രസ്വകാല ഇനങ്ങളുടെ വിത്ത്
-
ഉണക്കുമ്പോഴും സംഭരിക്കുമ്പോഴും മറ്റ് വിത്തുകളോ മാലിന്യങ്ങളോ കലരാതിരിക്കാന്‍ ശ്രദ്ധിക്കണം
-
അന്തരീക്ഷത്തില്‍ നിന്നും കൂടുതല്‍ ഈര്‍പ്പം വലിച്ചെടുക്കാത്തവിധം ഇരട്ട ചണച്ചാക്കുകളോ 700 ഗേജുള്ള പോളിത്തീന്‍ സഞ്ചികളോ വിത്ത് സൂക്ഷിക്കാന്‍ ഉപയോഗിക്കാം. വിത്തിന്റെ ഈര്‍പ്പം പത്ത് ശതമാനമോ അതില്‍ കുറവോ ആണെങ്കില്‍ അവ സൂക്ഷിക്കുന്നതിന് 400 ഗേജുള്ള പോളിത്തീന്‍ സഞ്ചികള്‍ മതിയാകും
-
വെറും നിലത്ത് വിത്തുചാക്കുകള്‍ അടുക്കി വയ്ക്കരുത്. പ്രത്യേക തട്ടുകളിലോ മരബഞ്ചുകളിലോ ചുവരില്‍ നിന്നും ഒരടി വിട്ട് അടുക്കണം. ശരിയായ വായുപ്രവാഹം ഉറപ്പുവരുത്തുന്നതിനും വിത്തിന്റെ ജീവനക്ഷമത നിലനിര്‍ത്തുന്നതിനും ഈ ക്രമീകരണം സഹായിക്കും. ഒരു അട്ടിയില്‍ എട്ടില്‍ കൂടുതല്‍ ചാക്കുകള്‍ അടുക്കരുത്. നല്ലവണ്ണം ഉണങ്ങാത്ത വിത്താണെങ്കില്‍ ഒരട്ടിയില്‍ മൂന്ന് ചാക്ക് മാത്രമെ പാടുള്ളു
-
സസ്യസംരക്ഷണ വസ്തുക്കളോ കളനാശിനികളോ വളങ്ങളോ വിത്തറയില്‍ സൂക്ഷിക്കരുത്. വിത്തറയുടെ ഭിത്തിയില്‍ പൊട്ടലോ വിള്ളലോ ഉണ്ടെങ്കില്‍ അവ സിമന്റ് ഉപയോഗിച്ച് അടച്ച് എലി ശല്യം ഒഴിവാക്കണം
-
വിത്ത് സൂക്ഷിക്കുന്നതിന് മുന്‍പ് തന്നെ സംഭരണിയിലെ കീടങ്ങളെ അകറ്റുന്നതിന് 2 % മാലത്തിയോണ്‍ തളിക്കണം
-
വേപ്പെണ്ണയില്‍ മുക്കിയ തുണി അട്ടികള്‍ക്കിടയില്‍ വെയ്ക്കുകയോ വേപ്പിന്‍ പിണ്ണാക്ക് തുണിയില്‍ കെട്ടി വിത്തുചാക്കിനകത്ത് വയ്ക്കുകയോ ചെയ്ത് കീടശല്യം ഒഴിവാക്കണം
-
എട്ടുമാസത്തില്‍ കൂടുതല്‍ സമയം വിത്ത് സൂക്ഷിക്കുന്നുണ്ടെങ്കില്‍ ഓരോ മാസം ഇടവിട്ട് അതിന്റെ അങ്കുരണശേഷി പരിശോധിക്കണം. ഹ്രസ്വകാലയിനങ്ങള്‍ക്ക് എട്ടുമാസത്തിലും കൂടുതല്‍ കാലം ജീവനക്ഷമത 80 ശതമാനമായി നിലനിര്‍ത്തുന്നതിന് വിത്ത് 4 മണിക്കൂര്‍ വെള്ളത്തില്‍ മുക്കിവച്ചതിനുശേഷം തണലില്‍ വീണ്ടും ഉണക്കി ഈര്‍പ്പം 13 ശതമാനത്തിലെത്തിച്ചാല്‍ മതിയാകും. ശരിയായ രീതിയില്‍ സംഭരിച്ച് സൂക്ഷിച്ചാല്‍ ഒന്നാം വിളയ്ക്ക് കൊയ്യുന്ന ജ്യോതി, ത്രിവേണി എന്നീ ഹ്രസ്വകാലയിനങ്ങളുടെ വിത്തിന് 9-10 മാസംവരെയും രണ്ടാം വിളയ്ക്ക് കൊയ്യുന്നവയുടേത് 8-9 മാസംവരെയും 80% അങ്കുരണശേഷി നിലനിര്‍ത്താം
-
ഓല മെടഞ്ഞുണ്ടാക്കിയ വല്ലങ്ങളില്‍ കൂവ,വാഴ,കരിങ്ങൊട്ട, തേക്ക് എന്നിവയിലേതെങ്കിലും ഒന്നിന്റെ ഇല നിരത്തിയതിനുശേഷം, മുളപ്പിച്ച പൊക്കാളിവിത്ത് സൂക്ഷിച്ചുവയ്ക്കുന്നത് അതിന്റെ അതിജീവനക്ഷമത രണ്ടാഴ്ചവരെ നിലനിര്‍ത്തുന്നതിന് സഹായിക്കും
വിത്ത് നിരക്ക്
-
80% അങ്കുരണശേഷിയുള്ള വിത്താണെങ്കില്‍ പറിച്ചുനടീലിന് ഹെക്ടറിന് 60 മുതല്‍ 85 കിലോഗ്രാം വിത്ത് വേണ്ടിവരും.
-
വിതയാണെങ്കില്‍ 80-100 കിലോഗ്രാം വേണം.
-
നുരിയിടീലിന് 80-90 കിലോഗ്രാം ആവശ്യമായി വരും.
-
പൊക്കാളി കൃഷിക്കുള്ള വൈറ്റില ഇനങ്ങള്‍ പാടത്തെ കൂനകളിലോ വാരങ്ങളിലോ വിതയ്ക്കുന്നതിന് ഹെക്ടറൊന്നിന് 100 കിലോഗ്രാം വിത്ത് വേണ്ടിവരും.
-
കുട്ടനാട്ടില്‍ ഇത് 125 കിലോഗ്രാം വേണ്ടിവരും. കൂടുതല്‍ ചെടികളുണ്ടായാല്‍ പിഴുത് മാറ്റണം
വിത്തുപചാരം
വിതയ്ക്ക് തൊട്ടുമുന്നെ ഒരു കിലോഗ്രാം വിത്തിന് 10 ഗ്രാം എന്ന നിരക്കില്‍ സ്യൂഡൊമോണാസ് ഫ്‌ളൂറസന്‍സ് (Psuedomonas flurosenec) പുരട്ടി ഉടനെ വിതയ്ക്കാം.
ചേറ്റുവിതയ്ക്കാണെങ്കില്‍ വിത്ത് 12-16 മണിക്കൂര്‍ നേരം 10 ഗ്രാം സ്യുഡൊമോണാസ് ഫ്‌ളൂറസന്‍സ് ഒരു ലിറ്റര്‍ വെള്ളത്തില്‍ കലക്കിയ ലായനിയിലോ 0.2% ബാവിസ്റ്റിന്‍ 50 WP ഒരു കിലോഗ്രാം വിത്തിന് 2 ഗ്രാം എന്ന തോതില്‍ ഒരു ലിറ്റര്‍ വെള്ളത്തിലുള്ള ലായനിയിലോ കുതിര്‍ത്തശേഷം വെള്ളം വാര്‍ത്തുകളഞ്ഞ് മുളയ്ക്കാന്‍ അനുവദിക്കാം. കുലവാട്ടം പതിവായി കണ്ടുവരുന്ന പ്രദേശങ്ങളില്‍ പോലും 30-60 ദിവസം വരെ ഈ രോഗത്തില്‍ നിന്നും ഞാറിനെ സംരക്ഷിക്കുന്നതിന് വിത്തുപചാരം കൊണ്ട് സാധിക്കും.
നെല്‍വിത്ത് 0.25% വീര്യമുള്ള കോപ്പര്‍ സള്‍ഫേറ്റ്(Copper sulphate) ലായനിയിലും 1 % വീര്യമുള്ള സിങ്ക് സള്‍ഫേറ്റ് (Zinc sulphate ) ലായനിയിലും 24 മണിക്കൂര്‍ കുതിര്‍ത്തതിനുശേഷം ലായനി വാര്‍ത്ത് മുളയ്ക്കാന്‍ അനുവദിക്കുക. ഒരു കിലോഗ്രാം വിത്ത് കുതിര്‍ക്കാന്‍ ഒരു ലിറ്റര്‍ സൂക്ഷ്മമൂലക ലായനി വേണ്ടിവരും.
To go to a previous article on paddy cultivation Kerala A to Z -- part one - https://malayalam.krishijagran.com/farming/grains-pulses/paddy-cultivation-in-kerala-a-to-z-part-1-keralathilae-nel-krishi/