ജനങ്ങൾക്ക് ആദായവും എന്നാൽ വരുമാനം നൽകുന്നതുമായ പോളിസികൾ ലൈഫ് ഇൻഷുറൻസ് കോർപ്പറേഷൻ (LIC) എല്ലാ കാലങ്ങളിലും അവതരിപ്പിക്കാറുണ്ട്. എൽഐസി അടുത്തിറക്കിയ മറ്റൊരു പുതിയ പോളിസിയാണ് എൽഐസി ജീവൻ ആസാദ്. സമ്പാദ്യത്തിനൊപ്പം ഇൻഷുറൻസും ലഭ്യമാക്കാമെന്നതാണ് ഈ പോളിസിയുടെ സവിശേഷത. എൽഐസി ജീവൻ ആസാദ് 868 പ്ലാൻ ഉപഭോക്താക്കൾക്ക് ഇൻഷുറൻസ് പരിരക്ഷ നൽകുക മാത്രമല്ല സമ്പാദ്യം എന്ന നിലയിലും ഗുണകരമാകും.
ഈ പോളിസിയുടെ മുഖ്യ ആകർഷണം, പോളിസി കാലാവധിയേക്കാൾ എട്ട് വർഷം കുറച്ച് പ്രീമിയം അടച്ചാൽ മതിയെന്നതാണ്. ഉദാഹരണത്തിന് 20 വർഷത്തെ പോളിസി കാലാവധി തിരഞ്ഞെടുക്കുകയാണെങ്കിൽ, പ്രീമിയം 12 വർഷം അടച്ചാൽ മതിയാകും. പരിമിതമായ പ്രീമിയം പേയ്‌മെന്റ് ഓപ്ഷനുണ്ട്. എൽഐസി ജീവൻ ആസാദ് നോൺ-ലിങ്ക്ഡ് ലിമിറ്റഡ് പ്രീമിയം എൻഡോവ്‌മെന്റ് പ്ലാനാണ്. പോളിസി കാലയളവിൽ പോളിസി ഉടമ മരണമടഞ്ഞാൽ കുടുംബത്തിന് സാമ്പത്തിക സഹായം ലഭിക്കും. അത്യാവശ്യഘട്ടങ്ങളിൽ പോളിസിയിൽ നിന്ന് വായ്പയെടുക്കാം.
ബന്ധപ്പെട്ട വാർത്തകൾ: LIC ജീവന്‍ ലാഭ് പോളിസി: 262 രൂപ മാറ്റി വയ്ക്കൂ, 20 ലക്ഷം രൂപ കൈയിലെത്തും
പോളിസി പ്രകാരം, ഏറ്റവും കുറഞ്ഞ സം അഷ്വേർഡ് തുക രണ്ട് ലക്ഷം രൂപയാണ്. ഏറ്റവും ഉയർന്ന തുക അഞ്ച് ലക്ഷം രൂപയും. 15 മുതൽ 20 വർഷം വരെയുള്ള കാലയളവിലേക്ക് പോളിസി എടുക്കാം.
മൂന്ന് മാസം മുതലുള്ള കുഞ്ഞിൻെറ പേരിൽ പോലും പോളിസി എടുക്കാം. പോളിസി എടുക്കുന്നതിനുള്ള ഏറ്റവും ഉയർന്ന പ്രായം 50 വയസ്സാണ്. വാർഷിക, അർദ്ധ വാർഷിക, ത്രൈമാസ ഇടവേളകളിൽ പോളിസി അടയ്ക്കാം. പ്രീമിയം അടയ്‌ക്കുന്ന കാലാവധി പോളിസി ടേമിൽ നിന്ന് എട്ട് വർഷം കുറച്ചായിരിക്കും.
പദ്ധതിക്ക് കീഴിൽ ഒരു പോളിസി ഉടമ 12 വർഷത്തേക്ക് എല്ലാ വർഷവും 25,120 രൂപ പ്രീമിയം അടച്ചാൽ മൊത്തം അടച്ച തുക 3,01440 രൂപ ആയിരിക്കും. എന്നാൽ മെച്യൂരിറ്റി കാലാവധിയിൽ ലഭിക്കുന്ന തുക ഏകദേശം അഞ്ച് ലക്ഷം രൂപ ആയിരിക്കും. പദ്ധതി കാലയളവിൽ പോളിസി ഉടമ മരണമടഞ്ഞാൽ ആശ്രിതർക്ക് ഉയർന്ന സം അഷ്വേർഡ് തുക നോമിനിക്ക് ലഭിക്കുകയും ചെയ്യും.