ടിക്കറ്റെടുക്കാതെ ഒരു തീവണ്ടി യാത്ര .അതും ശീതീകരിച്ച് സുഖപ്രദമാക്കിയ എ സി കോച്ചിൽ . തണുപ്പധികം വേണ്ടെന്നുള്ളവർക്കായി കമ്പാർട്ട്മെന്റിനോട് ചേർന്നുതന്നെ പ്ളാറ്റ് ഫോമിൽ ഇരിക്കാൻ പ്രത്യേകം അകത്തളം വേറെയും . വടകര നഗരത്തിൽ എടോടിയിൽ ഗ്രിഫി സൂപ്പർ മാർക്കറ്റിന് എതിർവശം 'പ്ളാറ്റ്‌ഫോം കഫെ 'എന്ന ബോർഡ് കാണാം .
തൊട്ടുപുറകിൽത്തന്നെ നിർത്തിയിട്ട ട്രെയിൻ കമ്പാർട്ട്മെന്റും കാണാം.
സംശയിച്ചുനിൽക്കേണ്ട .ടിക്കറ്റെടുക്കാതെ ആർക്കും ഇതിൽ കയറാം .
തീവണ്ടി മുറിയാണെങ്കിലും വടകരക്കാരുടെ ജനപ്രിയ റെസ്റ്റോറന്റ് ആയ പ്ലാറ്റഫോം കഫെ ഇവിടെയാണ് പ്രവർത്തിക്കുന്നത് . കോഴിക്കോട് കേന്ദ്രമായി പ്രവർത്തിക്കുന്ന ആഡിസ് ആർക്കിറ്റെക്ട്സിലെ ഇന്റീരിയർ ആർക്കിടെകട് ചോമ്പാല സ്വദേശി ദീപ്‌തിക് ദിവാകരൻ എന്ന യുവാവാണ് വിസ്‌മയകരമായ തോതിൽ ഈ തീവണ്ടി മുറിയുടെ രൂപ കൽപ്പന നിർവ്വഹിച്ചുകൊണ്ട് ജനശ്രദ്ധയാകർഷിച്ചത്
ഒപ്പം ആധുനിക സജ്ജീകരണങ്ങളടങ്ങിയ ഈ ജനപ്രിയ റെസ്റ്റോറിന്റെ നിർമ്മിതിയും അദ്ദേഹം തന്നെയാണ് നിർവ്വഹിച്ചത്. തീവണ്ടിമുറിലെപ്പോലെ തന്നെ നമ്പറിട്ട സീറ്റുകൾ ,മുകളിൽ ബർത്തുകൾ ,ഫാനുകൾ മറ്റ് അനുബന്ധസൗകര്യങ്ങൾ .
ഓരോ സീറ്റിൻറെയും വശങ്ങളിൽ പുറത്തേക്കുനോക്കുവാനുള്ള വിൻഡോകൾ. വിൻഡോകളെയെല്ലാം എൽ സി ഡി ഡിസ്പ്ളേ ഉറപ്പിച്ച് മനോഹരമാക്കിയിരിക്കുന്നു .
വിശദമായ മെനുനോക്കി ഭക്ഷണം ഓർഡർ ചെയ്‌തുകഴിഞ്ഞാൽ ടേബിളിലെത്തുന്നവരെ മുഷിഞ്ഞിരിക്കേണ്ട കാര്യവുമില്ല .
കൂകിക്കുതിച്ചുപായുന്ന തീവണ്ടി മുറിക്കുള്ളിലിരുന്നു പുറത്തേയ്ക്ക് നോക്കിയാൽ തെന്നിമാറുന്ന ദൃശ്യചാരുത . കണ്ണൂർ മുതൽ കോഴിക്കോട് വരെയുള്ള തീവണ്ടി യാത്രയിൽ കാണാനിടയുള്ള ചലനവേഗതയിലുള്ള പ്രകൃതിയുടെ വശ്യമനോഹാരിത ,തീവണ്ടിക്കാഴ്ച്ചകളുടെ ഇടമുറിയാത്ത നീണ്ടനിര ശബ്‌ദ സഹിതം ഇവിടെയിരുന്ന് ആസ്വദിക്കാനാവുന്നവിധം അശേഷം സ്വാഭാവികത്തനിമ ചോർന്നുപോകാതെയാണ് ദീപ്‌തിക് ദിവാകരൻ ഈ റെസ്‌റ്റോറെന്റിന് രൂപകൽപ്പന നിർവ്വഹിച്ചത്.