കഴിഞ്ഞ ഒരാഴ്ചയായി കേരളത്തിൽ വിവിധ പ്രദേശങ്ങളിലായി മഴ ലഭിച്ചു വന്നിരുന്നു. എന്നാൽ ഇനി കുറച്ചു ദിവസം കേരളത്തിൽ മഴ വിട്ടു നിൽക്കും. പൊതുവിൽ തെളിഞ്ഞ കാലാവസ്ഥ അടുത്ത ഏതാനും ദിവസങ്ങളിൽ അനുഭവപ്പെടും. പകൽ താപനില ഉയരുകയും രാത്രി തണുപ്പ് വർധിക്കുകയും ചെയ്യും.
സാധാരണ ജനുവരി മാസത്തിലെ അന്തരീക്ഷ സ്ഥിതി വരും ദിവസങ്ങളിൽ പ്രതീക്ഷിക്കാം.
അതേസമയം ആഗോള തലത്തിൽ ഈ വർഷം അന്തരീക്ഷ താപനില സാധാരണയിൽ കൂടുതൽ ആകാൻ സാധ്യതയാണ് ഉള്ളത്. കേരളത്തിലും ഈ വേനലിൽ ചൂട് സാധാരണയിൽ നിന്നും ഉയർന്നു നിൽക്കും.
ഉയർന്ന തിരമാല ജാഗ്രത നിർദേശം
കേരള തീരത്തും, തെക്കൻ തമിഴ്‌നാട് തീരത്തും 15-01-2024 (ഇന്ന്) രാത്രി 11.30 വരെ 1.0 മുതൽ 1.8 മീറ്റർ വരെ ഉയർന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) അറിയിച്ചു.
മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക
1. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം.
2. മൽസ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മൽസ്യബന്ധന ഉപകരണങ്ങളുടെ സുരക്ഷ ഉറപ്പാക്കണം.
3. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണമായും ഒഴിവാക്കുക.