പെൻഷൻകാർക്ക് ഇതാ സന്തോഷ വാർത്ത; എസ്ബിഐയിൽ ആനുകൂല്യം കിട്ടാൻ ബാങ്കിൽ പോകേണ്ടതില്ല

ബാങ്കിൽ പോകാതെ തന്നെ വീഡിയോ കോളിൽ ലൈഫ് സർട്ടിഫിക്കറ്റ് സമർപ്പിക്കുന്നതിനുള്ള ഘട്ടങ്ങൾ സ്റ്റേറ്റ് ബാങ്ക് ഓഫ് ഇന്ത്യ ( State Bank of India ) ആരംഭിച്ചു കഴിഞ്ഞു. പെൻഷൻ തുടർന്നും ലഭിക്കുന്നതിന്, എല്ലാ പെൻഷൻകാരും ഓരോ വർഷവും നവംബർ 30-നകം തങ്ങളുടെ ലൈഫ് സർട്ടിഫിക്കറ്റ് (Life Certificate) അതത് ബാങ്കുകളിൽ സമർപ്പിക്കണം.

എന്നാൽ 80 വയസിന് മുകളിൽ പ്രായമുള്ളവർക്ക് ലൈഫ് സർട്ടിഫിക്കറ്റ് സമർപ്പിക്കാനുള്ള സമയം ഒക്ടോബർ 1 മുതൽ തന്നെ ആരംഭിച്ചിരുന്നു.

ഒരു വ്യക്തി ഇപ്പോഴും ജീവിച്ചിരിപ്പുണ്ടെന്ന് സ്ഥിരീകരിക്കാൻ സംസ്ഥാന സർക്കാർ പൗരന് നൽകിയ ഔദ്യോഗിക പ്രസ്താവനയാണ് ലൈഫ് സർട്ടിഫിക്കറ്റ്. സർക്കാരുകളും പെൻഷനും ഇൻഷുറൻസ് കമ്പനികളും മറ്റ് ബോഡികളും ഇത് ആനുകാലികമായി പരിശോധിക്കേണ്ടതുണ്ട്. ലൈഫ് സർട്ടിഫിക്കറ്റിനെ പ്രൂഫ് ഓഫ് ലൈഫ്, സർട്ടിഫിക്കറ്റ് ഓഫ് അസ്തിത്വം അല്ലെങ്കിൽ ലെറ്റർ ഓഫ് അസ്തിത്വം എന്നും വിളിക്കുന്നു.

ഈ സാഹചര്യത്തിലാണ് പൊതുമേഖലാ ബാങ്കായ എസ്ബിഐ വയോജനങ്ങളുടെ ദുരിതം മനസ്സിലാക്കി നവംബർ ഒന്നു മുതൽ ലൈഫ് സർട്ടിഫിക്കറ്റ് സമർപ്പിക്കാനുള്ള പുതിയ സൗകര്യം ഏർപ്പെടുത്തിയത്.

വീഡിയോ കോൾ
പെൻഷൻകാർക്ക് വീട്ടിലിരുന്ന് വീഡിയോ കോൾ വഴി ലൈഫ് സർട്ടിഫിക്കറ്റ് സമർപ്പിക്കാൻ സേവനവുമായി എത്തിയിരിക്കുകയാണ് എസ്ബിഐ പെൻഷൻ സേവ (SBI Pension Seva). ഇനി ഇതിനായി ബാങ്കിൽ പോകേണ്ട കാര്യമില്ല എന്നതാണ് പ്രത്യേകത. മുൻപ് സാധാരണ ഗതിയിൽ മുതിർന്ന പൗരന്മാർ ബാങ്കിൽ പെൻഷൻ അധികൃതരുടെ മുന്നിൽ നേരിട്ട് ഹാജരായാണ് ലൈഫ് സർട്ടിഫിക്കറ്റ് സമർപ്പിക്കേണ്ടത്. എന്നാൽ പ്രായമായർക്കും, നേരിട്ട് ചെല്ലാൻ സാധിക്കാത്തവർക്കും ഇതൊരു പരിഹാര മാർഗമാണ്.

ബാങ്കിൽ പോകാതെ ലൈഫ് സർട്ടിഫിക്കറ്റ് സമർപ്പിക്കുന്നതിനുള്ള ഘട്ടങ്ങൾ വീഡിയോയിൽ കണ്ടെത്തുക

• ആദ്യം https://www.pensionseva.sbi/ എന്നതിലേക്ക് പോകുക.

• ‘വീഡിയോ LC’ ക്ലിക്ക് ചെയ്ത് നിങ്ങളുടെ എസ്ബിഐ പെൻഷൻ അക്കൗണ്ട് നമ്പർ നൽകുക.

• ആ അക്കൗണ്ടിൽ രജിസ്റ്റർ ചെയ്ത മൊബൈൽ നമ്പറിലേക്ക് വരുന്ന ഒടിപി നമ്പർ രജിസ്റ്റർ ചെയ്യണം.

• എല്ലാ നിബന്ധനകളും വ്യവസ്ഥകളും ശ്രദ്ധാപൂർവ്വം വായിച്ച് ‘Start Journey’ എന്നതിൽ ക്ലിക്ക് ചെയ്യുക.

• അടുത്തതായി, നിങ്ങളുടെ കൈയിൽ പാൻ കാർഡ് പിടിക്കുക, ‘I am ready’ എന്നതിൽ ക്ലിക്ക് ചെയ്ത് വീഡിയോ കോൾ ആരംഭിക്കാൻ അനുമതി നൽകുക.

• SBI ഉദ്യോഗസ്ഥൻ ചേരുമ്പോൾ തന്നെ നിങ്ങളുടെ വീഡിയോ കോൾ ആരംഭിക്കും. വീഡിയോ കോളിനിടയിൽ ബാങ്ക് ക്ലർക്ക് ബാൻ കാർഡ് കാണിക്കുക മാത്രമല്ല നിങ്ങളുടെ ഫോട്ടോ എടുക്കുകയും ചെയ്യും.

  എന്നിരുന്നാലും വീഡിയോ കോൾ പ്രക്രിയയിൽ എന്തെങ്കിലും ഒരു പ്രശ്നമുണ്ടായാൽ, നിങ്ങൾ നേരിട്ട് ബാങ്കിലേക്ക് പോകാൻ നിർബന്ധിതരാകും.