News

പരിസ്ഥിതി ലോല മേഖലകളില്‍ മാറ്റം വരുത്തരുത്; ദേശീയ ഹരിത ട്രിബ്യൂണല്‍

Haritha tribunal

കസ്തൂരിരംഗന്‍ കരട് വിജ്ഞാപനത്തിലെ പരിസ്ഥിതി ലോല മേഖലകളില്‍ മാറ്റം വരുത്തരുതെന്ന് ദേശീയ ഹരിത ട്രിബ്യൂണല്‍. പരിസ്ഥിതി ലോല മേഖലകളില്‍ മാറ്റം വരുത്തുന്നത് വലിയ പ്രത്യാഘാതമുണ്ടാക്കും. ആറ് മാസത്തിനകം അന്തിമ വിജ്ഞാപനം ഇറക്കാന്‍ വനം- പരിസ്ഥിതി മന്ത്രാലയത്തിനും ട്രൈബ്യൂണല്‍ നിര്‍ദേശം നല്‍കി. കേരളത്തിലുണ്ടായ പ്രളയത്തിന്റെ പശ്ചാതലത്തിലാണ് ഉത്തരവ്.

2017 ഫെബ്രുവരി 27നാണ് കസ്തൂരിരംഗന്‍ കരട് വിജ്ഞാപനം അവസാനമായി ഇറങ്ങിയത്. ഈ വിജ്ഞാപനത്തില്‍ ഉള്‍പ്പെട്ടിട്ടുള്ള പരിസ്ഥിതി ലോല മേഖലകളില്‍ മാറ്റം വരുത്തരുതെന്ന് കാണിച്ചാണ് ദേശിയ ഹരിത ട്രൈബ്യൂണല്‍ ഉത്തരവ് ഇറക്കിയിരിക്കുന്നത്. മാറ്റം വരുത്തുകയാണെങ്കില്‍ ട്രൈബ്യൂണലിന്റെ അംഗീകാരത്തോടെ ആയിരിക്കണം.

പരിസ്ഥിതി ലോല മേഖലയെ പ്രതികൂലമായി ബാധിക്കുന്ന നിര്‍മ്മാണപ്രവര്‍ത്തനങ്ങള്‍ക്ക് അനുമതി നല്‍കരുത്. 2017 ലെ കരട് വിജ്ഞാപനത്തില്‍ നിന്ന് പരിസ്ഥിതി ലോല പ്രദേശങ്ങളെ ഒഴിവാക്കരുത്. ട്രിബ്യൂണലിന്റെ അനുമതി ലഭിക്കാതെ കരടില്‍ മാറ്റങ്ങള്‍ വരുത്തരുത്. അന്തിമ വിജ്ഞാപനം പുറത്തിറങ്ങും വരെ പാരിസ്ഥിതിക അനുമതി നല്‍കരുത് തുടങ്ങിയ നിര്‍ദേശങ്ങളും ട്രിബ്യൂണലിന്റെ ഉത്തരവിലുണ്ട്.

നേരത്തെ കേരളം 2017ലെ കരട് വിജ്ഞാപനത്തില്‍ നിന്നും ഏലക്കാടുകള്‍, പട്ടയ പ്രദേശം തുടങ്ങിയവ ഉള്‍പ്പെട്ട 424 ചതുരശ്ര അടി പ്രദേശം ഒഴിവാക്കണമെന്ന് വനം പരിസ്ഥിതി മന്ത്രാലത്തോട് ആവശ്യപ്പെട്ടിരുന്നു. സംസ്ഥാനത്തിന്റെ ഈ ആവശ്യവും 2013ലെ കരട് വിജ്ഞാപനം പുനസ്ഥാപിക്കണമെന്ന പരിസ്ഥിതി പ്രവര്‍ത്തകരുടെ ആവശ്യവും തള്ളുന്നതാണ് പുതിയ ഉത്തരവ്. അന്തിമ വിജ്ഞാപനം ഉടന്‍ പുറത്തിറക്കണമെന്ന ഗോവ ഫൌണ്ടേഷന്‍റെ ഹരജിയിലാണ് ഹരിത ട്രൈബ്യൂണലിൻ്റെ നടപടി.


English Summary: National Green tribunal

Share your comments

Subscribe to newsletter

Sign up with your email to get updates about the most important stories directly into your inbox
Krishi Jagran Malayalam Magazine