മനുഷ്യരിലുണ്ടാകുന്ന ബാക്റ്റീരിയ, ഫംഗസ്, എന്നിവ അകറ്റാൻ ഉപയോഗിക്കുന്നതു പോലെ ചെടികളിലും കീടങ്ങളെ അകറ്റാന്‍ വെളുത്തുള്ളി കൊണ്ടുള്ള കീടനാശിനികൾ ഫലപ്രദമാണ്. ജൈവരീതിയില്‍ കൃഷി ചെയ്യുന്നവര്‍ക്ക് പരാഗണകാരികള്‍ക്ക് അപകടം വരുത്താതെ വളരെ സുരക്ഷിതവും പ്രകൃതിദത്തവുമായി ഉപയോഗിക്കാവുന്ന കീടനാശിനിയും കുമിള്‍നാശിനിയുമാണ് ഇത്.
ബന്ധപ്പെട്ട വാർത്തകൾ: കീടനാശിനികൾ കൈകാര്യം ചെയ്യുമ്പോൾ ശ്രദ്ധിക്കേണ്ട കാര്യങ്ങൾ
വെളുത്തുള്ളിയില്‍ അടങ്ങിയിരിക്കുന്ന അല്ലിസിന്‍ എന്ന സംയുക്തവും, എ.എസ്.എ.എല്‍. ഡയാലില്‍ ഡൈസള്‍ഫൈഡ്, ഡയാലില്‍ ട്രൈസള്‍ഫൈഡ് എന്നി പദാര്‍ഥങ്ങളുമാണ് കീടങ്ങള്‍ക്കെതിരെ പ്രവര്‍ത്തിക്കുന്നത്. അതുപോലെ ലെക്റ്റിനും ഇതിന് സമാനമായ സംയുക്തങ്ങളും കീടങ്ങളുടെ ജീവിതചക്രത്തിന് തടസം വരുത്താന്‍ സഹായിക്കുന്നു.
ബന്ധപ്പെട്ട വാർത്തകൾ: വെളുത്തുള്ളി കൊണ്ട് ആരോഗ്യം സംരക്ഷിക്കാം
പുല്‍ച്ചാടികളെയും ലാര്‍വകളെയും നശിപ്പിക്കാന്‍ വെളുത്തുള്ളിയുടെ നീരിലുള്ള എ.എസ്.എ.എല്‍ എന്ന സംയുക്തത്തിന് കഴിയും. ഉറുമ്പ്, കാബേജ് വേം, ചിതല്‍, നെമാറ്റോഡുകള്‍, ഒച്ചുകള്‍, വെള്ളീച്ചകള്‍ എന്നിവയെ നിയന്ത്രിക്കാനും ഇതിന് കഴിവുണ്ട്.
ചെറിയ വെളുത്തുള്ളികളാണ് കൂടുതല്‍ ഗുണം നൽകുന്നത്. പലതരത്തിലുള്ള വെളുത്തുള്ളി അടങ്ങിയ സ്‌പ്രേകള്‍ ഉപയോഗിക്കാറുണ്ട്. കൂടുതല്‍ ഫലപ്രദമായ കീടനാശിനി ഉണ്ടാക്കാനായി വെളുത്തുള്ളിയോടൊപ്പം ചില ഘടകങ്ങള്‍ കൂടി ചേര്‍ക്കാവുന്നതാണ്. അടുക്കളയില്‍ പാത്രം കഴുകാന്‍ ഉപയോഗിക്കുന്ന ദ്രാവകരൂപത്തിലുള്ള സോപ്പ് ചേര്‍ത്താല്‍ പ്രാണികളുടെ ശ്വസനവ്യവസ്ഥയില്‍ പ്രശ്‌നങ്ങളുണ്ടാക്കുകയും എളുപ്പത്തില്‍ നശിപ്പിക്കാന്‍ കഴിയുകയും ചെയ്യും.
ബന്ധപ്പെട്ട വാർത്തകൾ: കൃഷിയിലെ കീടങ്ങളെ തുരത്താൻ എളുപ്പത്തിൽ തയ്യാറാക്കാവുന്ന അഞ്ച് സസ്യ അധിഷ്ഠിത കീടനാശിനികൾ
യൂക്കാലിപ്റ്റസ് ഓയില്‍ പുതിന ഓയില്‍, വേപ്പെണ്ണ എന്നിവയെല്ലാം ചേര്‍ത്താല്‍ കീടങ്ങളുടെ നാഡീവ്യവസ്ഥയിലും പ്രത്യുല്‍പാദന വ്യവസ്ഥയിലും തകരാറുണ്ടാക്കാന്‍ കഴിയും. അതുപോലെ ഈച്ചകളെയും കൊതുകിനെയും ചിലന്തിയെയും തുരത്താന്‍ പെപ്പര്‍മിന്റും സ്പിയര്‍മിന്റും വെളുത്തുള്ളിക്കൊപ്പം ചേര്‍ത്താല്‍ മതി.
വിവിധ കീടനാശിനികൾ എങ്ങനെ തയ്യാറാക്കാമെന്ന് നോക്കാം
* വെളുത്തുള്ളി-പുതിന സ്‌പ്രേ: രണ്ട് മുഴുവന്‍ വെളുത്തുള്ളിക്കൂട്ടങ്ങളില്‍ നിന്ന് ഓരോന്നായി വേര്‍പെടുത്തിയെടുക്കുക. മൂന്ന് കപ്പ് പുതിനയില, രണ്ട് ടേബിള്‍സ്പൂണ്‍ ചുവന്ന മുളക്, ഒരു ടേബിള്‍ സ്പൂണ്‍ പാത്രം കഴുകുന്ന സോപ്പ് ലായനി എന്നിവയാണ് ഇത് തയ്യാറാക്കാന്‍ ആവശ്യം. പുതിനയും വെളുത്തുള്ളിയല്ലികളും അരച്ചെടുക്കുക. ഇതിലേക്ക് 12 കപ്പ് വെള്ളം ഒഴിക്കുക. മുളക് ചതച്ച് ചേര്‍ക്കുക. നന്നായി തിളപ്പിക്കുക. ഒരു രാത്രി തണുക്കാന്‍ വെക്കുക. ഈ മിശ്രിതം രാവിലെ അരിച്ചെടുക്കുക. ഏറ്റവും അവസാനം മാത്രം സോപ്പ് ലായനി ചേര്‍ക്കുക. സ്‌പ്രേ ബോട്ടിലില്‍ ഒഴിച്ച് ചെടികളില്‍ തളിക്കാം.
* വെളുത്തുള്ളി- മുളക് സ്‌പ്രേ: വെളുത്തുള്ളി അരച്ചതിലേക്ക് മുളക് ചേര്‍ത്ത് അരച്ചെടുക്കുക. രണ്ട് കപ്പ് വെള്ളം ചേര്‍ത്ത് യോജിപ്പിക്കുക. അടപ്പുള്ള ഗ്ലാസ് പാത്രത്തില്‍ ഒഴിച്ച് 24 മണിക്കൂര്‍ ഇരുട്ടുള്ള സ്ഥലത്ത് വെക്കുക. പിന്നീട് നാല് ലിറ്റര്‍ വരത്തക്കവിധത്തില്‍ കുറച്ചുകൂടി വെള്ളമൊഴിക്കുക. തുണിയിലൂടെ അരിച്ചെടുത്ത് സ്‌പ്രേ ബോട്ടിലില്‍ നിറയ്ക്കുക.
* വെളുത്തുള്ളി സ്‌പ്രേ: മിശ്രിതം നിറച്ചിരിക്കുന്ന പാത്രം നന്നായി കുലുക്കി യോജിപ്പിക്കണം. വൈകുന്നേരങ്ങളിലോ സൂര്യപ്രകാശം കുറവുള്ള ദിവസങ്ങളിലോ ഇലകളില്‍ സ്‌പ്രേ ചെയ്യണം. നല്ല സൂര്യപ്രകാശമുള്ളപ്പോള്‍ ഇലകള്‍ കരിഞ്ഞുപോകും.
Share your comments