വൈഗ 2018; കുളവാഴയിൽ വിസ്മയമൊരുക്കി ആലപ്പുഴ എസ്.ഡി കോളേജിന്റെ സ്റ്റാൾ

പ്രളയാനന്തരം ജലാശങ്ങളിൽ അടിഞ്ഞു കൂടിയ കുളവാഴയും പായലും നീക്കം ചെയ്യാൻ ചെലവ് കുറഞ്ഞ രീതിയുമായി ആലപ്പുഴ എസ്.ഡി. കോളേജ്. കുളവാഴ നീക്കാന്‍ ലക്ഷക്കണക്കിന് രൂപ വെള്ളത്തിലൊഴുക്കുന്നതിനുപകരം അതുപയോഗിച്ച് മൂല്യവര്‍ധിത ഉത്പന്നങ്ങള്‍ തീർത്താണ് ആലപ്പുഴ എസ്.ഡി. കോളേജിലെ സെന്റര്‍ ഫോര്‍ റിസര്‍ച്ച് ഓണ്‍ അക്വാട്ടിക് റിസോഴ്സ് വിഭാഗം ശ്രദ്ധയാകാർഷിച്ചത്. സംസ്ഥാന കൃഷിവകുപ്പിന്റെ ആഭിമുഖ്യത്തിൽ തൃശ്ശൂർ തേക്കിൻകാട് മൈതാനിയിൽ നടക്കുന്ന വൈഗ 2018 - മൂന്നാമത് അന്താരാഷ്ട്ര കാർഷികശില്പശാലയും പ്രദർശനവും-എന്നതിലാണ് പുതുമയും വ്യത്യസ്തമാർന്നതുമായ  എസ്.ഡി. കോളേജിന്റെ സ്റ്റാൾ പ്രദർശിപ്പിച്ചിരിക്കുന്നത്‌.  കുളവാഴ ഉപയോഗിച്ച് വികസിപ്പിച്ചെടുത്ത വൈവിധ്യമാർന്ന ഉൽപ്പന്നങ്ങളാണ് ഏവരെയും അത്ഭുതപ്പെടുത്തുന്നത്. 

മുട്ട വയ്ക്കാനുപയോഗിക്കുന്ന ട്രേ മുതൽ മ്യൂറൽ പെയിന്റിങ് ചെയ്യാൻ കഴിയുന്ന ക്യാൻവാസ് വരെ പ്രദർശനത്തിനുണ്ട്. എത്ര വലിയ ശബ്ദം പോലും കടത്തിവിടാൻ കഴിയാത്ത തരത്തിൽ നിർമ്മിച്ചിരിക്കുന്ന സൗണ്ട് അബ്സോർബിങ്ങ് ബോർഡ്, പാത്രങ്ങൾ, മീനുകൾക്കുള്ള ഭക്ഷണം, ജൈവവളമായി മാറ്റാവുന്ന ചെടിച്ചെട്ടികൾ, പ്രകൃതിദത്തമായ പെയിന്റ്,  എന്ന് വേണ്ട മുൻ രാഷ്ട്രപതി എ. പി.ജെ. അബ്ദുൾ കലാമിന്റെ ശിൽപ്പം വരെ പുതുമ നിറഞ്ഞതായി.