Features

കറുത്ത സുന്ദരി

ബ്ലാക്ക് റോസ് ലോകത്ത് വളരുന്ന ഒരേയൊരു രാജ്യമാണ് ടര്‍ക്കി. അവിടെ യൂഫ്രട്ടീസ് നദീ തീരത്ത് സ്ഥിതി ചെയ്യുന്ന ഹാല്‍ഫേറ്റി എന്ന ഗ്രാമത്തില്‍ മാത്രമാണ് ഈ ബ്ലാക്ക് റോസ് വളരുന്നത്. അതും വളരെ കുറഞ്ഞ അളവില്‍ മാത്രം. വേനലില്‍ മാത്രമാണ് ഈ അപൂര്‍വ്വ ഇനം പുഷ്പം ഈ ഗ്രാമത്തില്‍ വിരിയുന്നത് എന്ന പ്രത്യേകത കൂടിയുണ്ട്. 
 
ഹാല്‍ഫേറ്റി എന്ന ഈ ഗ്രാമത്തിലെ മണ്ണിന്റെ പ്രത്യേകത, നദിയുടെ അടിത്തട്ട് ഒഴുക്കി കൊണ്ട് വരുന്ന മണ്ണിന്റെ പ്രത്യേകതയും അവിടുത്തെ അനുകൂല സാഹചര്യങ്ങളും കൊണ്ട് മാത്രമാണ് ലോകത്ത് വിരളമായ് കാണപ്പെടുന്ന ഈ പുഷ്പം ഇവിടെ വിരിയുന്നത്. ഇവിടുത്തെ ഈ പ്രത്യേകതയുള്ള മണ്ണ് മറ്റെവിടെയെങ്കിലും കൊണ്ട് പോയി പരീക്ഷിച്ച് നോക്കാമെന്ന് വെച്ചാലൊ ഈ ചെടി അവിടെയൊന്നും വളരില്ല. ഹാല്‍ഫേറ്റി വിട്ട് മറ്റൊരിടത്തും ബ്ലാക്ക് റോസ് വളരില്ല എന്നാണ് പറയപ്പെടുന്നത്. ഈ കറുത്ത സുന്ദരിക്ക്  വളരുന്നതിനാവശ്യമായ എല്ലാ അനുകൂല ഘടകങ്ങളും പ്രകൃതി ഒരുക്കിയിരിക്കുന്നത് ഹാല്‍ഫേറ്റി എന്ന കൊച്ചു ഗ്രാമത്തില്‍ മാത്രമാണ്. അതിനാല്‍ ഇത് ടര്‍ക്കിഷ് ഹാല്‍ഫേറ്റി റോസ്  എന്ന പേരിലും അറിയപ്പെടുന്നുണ്ട്. പ്രകൃതി ലോകത്തിന് സമ്മാനിക്കുന്ന അത്ഭുതങ്ങളുടെ നീണ്ട നിരയില്‍ ഈ കൊച്ചു സുന്ദരിയും ഇടം പിടിച്ചിട്ടുണ്ട്. 

Share your comments