കടങ്കഥയിലെ കൃഷിയും വിളയും

രസകരമായ കടങ്കഥകളിലൂടെ കൃഷിയെയും വിളകളെയും പരിചയപ്പെടാം…

തെങ്ങിനെ കുറിച്ചുള്ള കടങ്കഥകൾ

അടിക്കു കൊടുത്താല്‍ മുടിക്കു കാണാം– തെങ്ങ്

ആനക്കൊമ്പില്‍ നെടിയരി- തെങ്ങിന്‍ പൂക്കുല

ഒരമ്മയുടെ മക്കളെല്ലാം മുക്കണ്ണന്മാര്‍- തേങ്ങ

ഒരു കുന്തത്തിന്മേല്‍ ആയിരം കുന്തം- തെങ്ങോല

കണ്ണോളം വെള്ളമുണ്ട്, മുങ്ങി കുളിക്കാന്‍ വെള്ളമില്ല- കരിക്ക്

കണ്ണുണ്ട്, അസ്ഥിയുണ്ട്, മാംസമുണ്ട്, രോമമുണ്ട്, മനുഷ്യനല്ല, മൃഗമല്ല, പക്ഷിയല്ല- തേങ്ങ

കാടുവെട്ടി, തോടുവെട്ടി, പാറ വെട്ടി വെള്ളം കണ്ടു- നാളികേരം

പച്ചച്ചൊരു മുരിക്കിന്‍ പെട്ടി, പെട്ടി നിറയെ ചപ്പും ചവറും, ചെപ്പിനകത്തുനിറയെ കുപ്പി, കുപ്പിയിലൊക്കയോരോവിധ ഗുളിക- തേങ്ങ

മല പിറന്ന ഭൂമിയില്‍ ഇല കവിഞ്ഞ മരത്തിന്റെ പേരു പറയാത്തവര്‍ക്കായിരം കടം- തെങ്ങ്

പുളിമരത്തെ കുറിച്ചുള്ള കടങ്കഥകൾ

ആനയെ തളയ്ക്കാന്‍ തടിയുണ്ട്, കടുകു പൊതിയാനിലയില്ല-  പുളിമരം

അടി മദ്ദളം, ഇല ചുക്കിരി, കായ കൊക്കിരി- പുളിമരം

ചുവടൊരു പര്‍വ്വതം, തടിയൊരു തൂണ്‍, ഇലയൊരു കിന്നരം, മക്കളൊക്കെ കാക്കിരി പീക്കിരി- പുളിമരം

നെല്ലിനെ കുറിച്ചുള്ള കടങ്കഥകൾ

അടിക്ക്‌വെട്ട്, നടുക്ക് കെട്ട്, തലയ്ക്ക് ചവിട്ട്- നെല്ല്

അവിടെ കുത്തി, ഇവിടെ കുത്തി, അമ്പലം കടത്തി കുത്തി– ഞാറ് നടുന്നത്

ആടിയാടി അഴകനെ പെറ്റു, അഴകനകത്തും, അമ്മ പുറത്തും- നെല്ലും വൈക്കോലും

ഇത്തിരിയുള്ളൊരു കിച്ചാണ്ടി, വയറു പിളര്‍ന്നു കിടപ്പാണ്ടി- പുഴുങ്ങിയ നെല്ല്

കട കത്തിച്ചു, തല കത്തിച്ചു- നെല്ല്

കൂനന്‍ കൊമ്പനൊരു തോടുണ്ടാക്കി, പല്ലന്‍ വന്നതു തട്ടിനിരത്തി- നിലം ഉഴുത് തട്ടി നിരത്തുക

തല പത്തായത്തില്‍, തടി തൊട്ടിയില്‍- നെല്ലു കൊയ്ത് മെതിക്കുക

പോകുമ്പോല്‍ പൊന്നു മണി, വരുമ്പോള്‍ വെള്ളിമണി- നെല്ല് വറുത്ത് മലരാക്കുക

മൂക്ക് മൂന്ന്, നാക്ക് നാല്, നടകാല് പത്ത്- കന്നുപൂട്ടുക

രണ്ടമ്മയ്ക്കും കൂടി ഒരു തലയിണ- വരമ്പ്

രസകരവും ചിന്തിപ്പിക്കുന്നതുമായ മറ്റു വിളകൾ

അടി പാറ,നടു വടി,തല കാട്- ചേന

എനിക്കു അമ്മ തന്ന ചേല നനച്ചിട്ടും നനച്ചിട്ടും നനയുന്നില്ല- ചേമ്പില

ഇരുമ്പു പെട്ടിയില്‍ വെള്ളിക്കട്ടി- മാങ്ങയണ്ടി

ഇല കത്തിപോലെ, കായ കളിക്കുടുക്കപോലെ- മാവ്

അടി ചെടി, നടു മദ്ദളം, തല നെല്‍ച്ചെടി- കൈതച്ചക്ക

ആറ്റു കന്യക കുങ്കുമത്തളികാഭരണമണിഞ്ഞു- താമരപ്പൂവ്

ഇട്ടിലിടുക്കിലിളുക്കാശി തെങ്ങിന്മേല്‍ പത്തു നൂറു കൊട്ടത്തേങ്ങ- ഈന്തപ്പന

അനേകം വേലി കെട്ടി, അതിനകത്തൊരു വെള്ളിക്കോല്‍- ഉണ്ണിപ്പിണ്ടി

അടയുടെയുളളിലൊരു പെരുമ്പട- തേനീച്ചക്കൂട്

ആദ്യം പൊന്തിപ്പൊന്തി, പിന്നെ തൂങ്ങിത്തൂങ്ങി-   വാഴ

കാട്ടിലമ്മയ്ക്കു തലയില്‍ ഗര്‍ഭം- പന

ഇപ്പോള്‍ പണിത പുത്തന്‍പുരയ്ക്ക് പത്തഞ്ഞൂറ് കിളിവാതില്‍- തേനീച്ചക്കൂട്

ഇരുട്ടു കോരി വെയിലത്തിട്ടു- എള്ള് ഉണക്കാന്‍ ഇടുക

ഇപ്പോള്‍ വെട്ടിയ പുത്തന്‍ കിണറ്റില്‍ തൂവെത്തൂവേ വെള്ളം- കരിക്ക്

ഉണ്ണാത്തമ്മയ്ക്കു ചട്ടിത്തൊപ്പി- വൈക്കോല്‍ത്തുറു

ഉച്ചാണ്ടി മരക്കൊമ്പില്‍ കരിം പൂച്ച കണ്ണുതുറിപ്പിച്ചിരിക്കുന്നു- ഞാവല്‍പ്പഴം

ഉച്ചിക്കുടുമ്മന്‍ ചന്തയ്ക്കു പോയി- കൈതച്ചക്ക

കാട്ടില്‍ പട്ടും ചുറ്റിയിരിക്കുന്നു- കൈതച്ചക്ക

ഊരിയവാള്‍ ഉറയിലിട്ടാല്‍ പൊന്നിട്ട പത്തായം തരാം- കറപാല്‍

എന്റമ്മയ്ക്ക് തോളോളം വള- കവുങ്ങ്

എന്റെ നാക്കില്‍ നിനക്കു വിരുന്ന്- വാഴയില

ഒറ്റക്കാലന്‍ കിളി ഒരു പറ മുട്ടയിട്ടു- കവുങ്ങ്, അടയ്ക്ക

ഒരു കൊമ്പത്തൊരു കുടം ചോര- ചെമ്പരത്തിപ്പൂവ്

ഒരമ്മയുടെ മക്കളെല്ലാം ഒറ്റക്കണ്ണന്മാര്‍- അടയ്ക്ക

ഒരമ്മയുടെ മക്കളെല്ലാം നരയന്‍മാര്‍- കുമ്പളങ്ങ

ചാമ്പല്‍ കുള്ളന്‍ ചന്തയ്ക്കു പോയി- കുമ്പളങ്ങ

ഒരമ്മയുടെ മക്കളെല്ലാം പിച്ചാത്തി വീരപ്പന്മാർ- മാവില

ഒരമ്മയുടെ മക്കളെല്ലാം ചൊറിപ്പിടിച്ച്- പാവയ്ക്ക

ഒരു ഭരണിയില്‍ രണ്ടച്ചാര്‍- കോഴിമുട്ട

കട കിണ്ണം, നടു തൂണ്‍, തല കാട്- ചേന

കണ്ടാല്‍ സുന്ദരി തോലു കളഞ്ഞാല്‍ കഴമ്പില്ല- ഉള്ളി

കറിക്കു മുമ്പന്‍, ഇലയ്ക്ക് പിമ്പന്‍- കറിവേപ്പില

കറുത്തകാളയെ കുളിപ്പിച്ചപ്പോള്‍ വെള്ളക്കാളയായി- ഉഴുന്ന്

കണ്ടാല്‍ വടി, തിന്നാന്‍ മധുരം- കരിമ്പ്

കൈയില്‍ വടി, വായില്‍ മധുരം-കരിമ്പ്

കയ്ക്കും പുളിക്കും മധുരിക്കും മിഠായി- നെല്ലിക്ക

കുലുകുലു കൊമ്പത്തായിരം രസക്കുടുക്ക- നെല്ലിക്ക

കാ കച്ചക പിച്ചക, പൂ മഞ്ഞക്ക പിഞ്ഞക്ക, ഇല പച്ചക്ക, പിച്ചക്ക- കയ്പക്ക

കാട്ടില്‍ തേന്‍ക്കുടം തൂങ്ങിത്തൂങ്ങി- നാരങ്ങ

കുഞ്ഞിസഞ്ചിയില്‍ നിറയെ ചില്ലറ- വറ്റല്‍മുളക്

പച്ച പന്തലിട്ട്, പവിഴമാല ഞാത്തുമിട്ട്, ആയിരം കായും കായിച്ച്- മുളക്

ചെറുവിരലോളം പോന്ന തിരിയില്‍ പത്തുമുപ്പത് പവിഴമണി- പഴുത്ത കുരുമുളക്

നൂല്‍ത്തിരി പോയൊരു മുത്തുമാലയായ്- കുരുമുളക് കുല

കൊയ്തു കൊയ്തു നെയ്ത്തിനു പോയി, കൊയ്ത കുറ്റി മേയാന്‍ പോയി- ചെമ്മരിയാട്

കൊച്ചിയില്‍ വിതച്ചതു കോവളത്തു കൊയ്തു- മത്തങ്ങ

കൈപ്പുണ്ട് കാഞ്ഞിരമല്ല, മുള്ളുണ്ട് മുരിക്കല്ല, വാലുണ്ട് വാനരനല്ല- പാവക്ക

കൈപ്പടം പോലെന്‍ ഇല, പെണ്ണുങ്ങളുടെ വിരല്‍ പോലെന്‍ കായ- വെണ്ട

ചട്ടിയില്‍ ചട്ടി പതിനെട്ടു ചട്ടി- തെങ്ങിന്‍പട്ട

ചട്ടിത്തലയന്‍ ചന്തയ്ക്കു പോയി- തണ്ണിമത്തന്‍

ചുവന്നത് തിന്ന് കറുത്തത് തുപ്പി- തണ്ണിമത്തന്‍ തിന്ന് കുരു തുപ്പുക

ചത്തവന്റെ വയറ്റില്‍ ചുട്ടവനെ കയറ്റി- ചക്ക മുറിക്കുക

ചില്ലത്തുഞ്ചത്താടിത്തൂങ്ങി പഞ്ചാര പൈങ്കിളി മേവുന്നു- കശുമാങ്ങ

ചില്ലിക്കൊമ്പന്‍ ചുവന്നപക്ഷി ചാഞ്ചാടുന്നു- പറങ്കിമാങ്ങ

ചെറുപ്പത്തില്‍ കറുത്തിട്ട്, വലുപ്പത്തില്‍ ചുവന്നിട്ട്- മരോട്ടിക്കായ

തെക്കുതെക്കൊരാല്, ആലു നിറയെ പന്ത്, പന്തിനുള്ളില്‍ മുട്ട, മുട്ടയ്ക്കുള്ളില്‍ എണ്ണ- മരോട്ടിക്കായ

തേന്‍ കുടത്തില്‍ ഒറ്റക്കണ്ണന്‍- ചക്കച്ചുളയും കുരുവും

തൊപ്പിക്കാരന്‍ ചന്തയ്ക്ക് പോയി- അടയ്ക്ക

നാലു മണിക്ക് മിഴിതുറക്കും കുഞ്ഞോമന- നാലുമണിപ്പൂവ്

നിലം കീറി പൊട്ടെടുത്തു- മഞ്ഞള്‍

പച്ച കണ്ടു പച്ചകൊത്തി, പച്ചകൊത്തി പാറ കണ്ടു, പാറകൊത്തി വെള്ളി കണ്ടു, വെള്ളികൊത്തി വെള്ളം കണ്ടു- നാളികേരം

പിടിച്ചാല്‍ ഒരു പിടി, അരിഞ്ഞാല്‍ ഒരു മുറം- ചീര

പിരിയാത്ത പാല്‍- റബ്ബര്‍ പാല്‍

പുറം പച്ചക്കുഴല്‍, അകം വെള്ളത്തകിട്- മുള

പുറം മുഴുവന്‍ മുള്ളുണ്ട് ചക്കയല്ല, ഉടച്ചാല്‍ വെളുത്തിരിക്കും തേങ്ങയല്ല, ആട്ടിയാല്‍ എണ്ണ കിട്ടും എള്ളല്ല- ആവണക്ക

പുറം പൊന്തം പൊന്തം,തലയില്‍ ചട്ടിതൊപ്പി- വൈക്കോല്‍ത്തുറു

മണ്ണിനുള്ളില്‍ പൊന്നമ്മ- മഞ്ഞള്‍

മണ്ണിനുള്ളില്‍ വെള്ളിയെഴുത്താണി- ശതാവരിക്കിഴങ്ങ്

മലയരികെ പോകുന്ന കുട്ടിച്ചാത്തന്റെ അട്ടഹാസം കേട്ട് ഭൂമിദേവി ഗര്‍ഭിണിയായി- ഇടിവെട്ടി കൂണ്‍ മുളച്ചു

മാനം വളഞ്ഞ വളവിനകത്ത്, നേരം തെളിഞ്ഞ തെളിവിനകത്ത്, മേല്‍പോട്ടു കായ് തുടങ്ങി നില്‍ക്കുന്ന മരം- എള്ള്

മാനത്തെ അങ്കത്തിന് ഭൂമിദേവി പിടിച്ച പരിച- കൂണ്‍

മുക്കണ്ണന്‍ ചന്തയ്ക്കു പോയി- തേങ്ങ

രണ്ട് പറമ്പ് അടിക്കാനൊരു ചൂല്- മുളംകൂട്ടം

വട്ടം വട്ടം വളയിട്ട് നെട്ടം നെട്ടം വളരുന്നു- കവുങ്ങ്

വലിയൊരു വണ്ണന്‍ പുഴുവാണതിനുടെ വാലിന്മേലുണ്ടെല്ലാം മുള്ളും- വഴുതിന