കേരളത്തിലെ ക്ഷീരമേഖല രാജ്യത്തിന് മാതൃകയെന്ന് ധനമന്ത്രി

കൊല്ലം: കേരളത്തിലെ ക്ഷീരമേഖലയുടെ പ്രവർത്തനങ്ങൾ രാജ്യത്തിന് മാതൃകയെന്ന് ധനമന്ത്രി കെ.എൻ ബാലഗോപാൽ. വെണ്ടാർ ക്ഷീരോത്പാദക സഹകരണ സംഘം ആസ്ഥാന മന്ദിരത്തിന്റെ ഉദ്ഘാടനം മന്ത്രി നിർവഹിച്ചു. ക്ഷീരകർഷകരുടെ ക്ഷേമത്തിനായി നിരവധി പ്രവർത്തനങ്ങളാണ് സർക്കാർ നടപ്പിലാക്കുന്നത്. സംസ്ഥാനത്ത് പുതുതായി ആരംഭിച്ച മൊബൈൽ വെറ്ററിനറി യൂണിറ്റുകളിലൂടെ കർഷകരുടെ വീട്ടുപടിക്കൽ സേവനങ്ങൾ ലഭ്യമാക്കാൻ സാധിക്കുന്നു. ക്ഷീരമേഖല നേരിടുന്ന വെല്ലുവിളികളിൽ നിന്നും കർഷകരെ സഹായിക്കുന്നതിനായി സര്‍ക്കാർ വിവിധ തരത്തിലുള്ള ഇടപെടലുകളാണ് നടത്തി വരുന്നത്. മൃഗസംരക്ഷണ ക്ഷീര വികസന മേഖലയിൽ കാലോചിതമായ വികസന പ്രവർത്തനങ്ങൾ നടപ്പിലാക്കും.

കൂടുതൽ വാർത്തകൾ: ബർഗറിൽ നിന്നും തക്കാളി ഔട്ട്; മക്ഡൊണാൾസ് വിഭവങ്ങളിൽ തക്കാളി ഉണ്ടാകില്ല

വെണ്ടാർ ക്ഷീരോത്പാദക സഹകരണ സംഘത്തിന്റെ എ.എം.സി.യു ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. പാലുത്പാദനത്തിൽ സ്വയംപര്യാപ്തത കൈവരിക്കുന്നതിനായി നിരവധി പദ്ധതികളാണ് സർക്കാർ ആവിഷ്കരിച്ച് നടപ്പിലാക്കുന്നതെന്നും മൃഗങ്ങളിൽ ഉണ്ടാകുന്ന രോഗങ്ങൾ ആദ്യഘട്ടത്തിൽ തന്നെ തിരിച്ചറിഞ്ഞ് അവ ഭേദമാക്കുന്നതിന് മൊബൈൽ വെറ്ററിനറി യൂണിറ്റുകൾ സഹായകരമാകുമെന്നും ക്ഷീര കർഷകരുടെ ക്ഷേമം ഉറപ്പാക്കുന്നതിന് ആവശ്യമായ നടപടികൾ സ്വീകരിക്കുമെന്നും ഡെപ്യൂട്ടി സ്പീക്കർ പറഞ്ഞു.

കുളക്കട ഗ്രാമപഞ്ചായത്ത് പ്രസിഡന്റ് ഇൻ ചാർജ് കോട്ടയിൽ രാജു അധ്യക്ഷനായി. ജില്ലാ പഞ്ചായത്തംഗം ആർ രശ്മി, വെണ്ടാർ ക്ഷീര സംഗമം പ്രസിഡന്റ് ബി ഹരികുമാർ, വെട്ടിക്കവല ബ്ലോക്ക് പഞ്ചായത്ത് എ എക്സ് ഇ എസ് സുരേഷ് കുമാർ, ക്ഷീരവികസന വകുപ്പ് ഡെപ്യൂട്ടി ഡയറക്ടർ ബി എസ് നിഷ, വെട്ടിക്കവല ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ എസ് രഞ്ജിത്ത് കുമാർ, എ അജി, ക്ഷീരവികസന ഓഫീസർ അശ്വതി എസ് നായർ, വാർഡ് അംഗങ്ങളായ ജയകുമാർ, ജി രഘു, വെണ്ടർ ക്ഷീരോത്പാദക സഹകരണ സംഘം സെക്രട്ടറി അജു ബി നായർ, രാഷ്ട്രീയകക്ഷി നേതാക്കൾ, സാമൂഹിക പ്രവർത്തകർ തുടങ്ങിയവർ പങ്കെടുത്തു.