മതിലകം ബ്ലോക്ക് പഞ്ചായത്തിന്റെ കീഴിലുള്ള അഗ്രോ സർവ്വീസ് സെന്ററിന്റെ ആഭിമു ഖ്യത്തിൽ ഫെബ്രുവരി 15, 16 തീയതികളിൽ കുംഭ വിത്ത് മേളയും കാർഷിക സെമിനാറും സംഘടിപ്പിക്കുന്നു.
അഗ്രോ സർവീസ് സെന്ററിന്റെ വികസനവുമായി ബന്ധപ്പെട്ട ചർച്ചകൾ ചെയ്യുന്നതിന് ഇ ടി ടൈസൺ മാസ്റ്റർ എംഎൽഎയുടെ അധ്യക്ഷതയിൽ ചേർന്ന യോഗത്തിലാണ് തീരുമാനം.
മതിലകം ബ്ലോക്ക് പഞ്ചായത്തിൽ നടത്തുന്ന കുംഭവിത്ത് മേളയിൽ ചേന, ചേമ്പ്, കാച്ചിൽ, മധുര കിഴങ്ങ്, മഞ്ഞൾ, ഇഞ്ചി എന്നിവയുടെ വിവിധയിനങ്ങളുടെ പ്രദർശനവും വിൽപനയും ഉണ്ടാകും.
കാച്ചിൽ ഇനങ്ങളായ നീല, ഇഞ്ചി, വെള്ളത്തൂണൻ , പനച്ചിക്കോടൻ എന്നിവയും, ചേന ഇനങ്ങളായ ഗജേന്ദ്ര, കുഴി മുണ്ടൻ, ശ്രീ ആതിര, ശ്രീപത്മം തുടങ്ങിയവയും, ചേമ്പിൽ കപ്പ, ശീമ, പാൽ, ചെറു ചേമ്പ് തുടങ്ങിയ വിവിധ ഇനങ്ങളും ഉണ്ടാകും.
കൂടാതെ ഇഞ്ചി, മഞ്ഞൾ ഇവയുടെ വിവിധയിനങ്ങളും മേളയിലുണ്ടാകും. ഈ വിളകളെ കുറിച്ചുള്ള കാർഷിക സെമിനാറും നടക്കും.
യോഗത്തിൽ ബ്ലോക്ക് പഞ്ചായത്ത് പ്രസിഡന്റ് സി കെ ഗിരിജ, പെരിഞ്ഞനം പ്രസിഡന്റ് വിനീത മോഹൻദാസ്, എടത്തിരുത്തി പഞ്ചായത്ത് പ്രസിഡന്റ് ടി കെ ചന്ദ്രബാബു, ബ്ലോക്ക്-പഞ്ചായത്ത് അംഗങ്ങൾ, പാപ്പിനിവട്ടം സർവ്വീസ് സഹകരണ ബാങ്ക് പ്രസിഡന്റ് കെ എസ് ബിജു, കൃഷി അസിസ്റ്റന്റ് ഡയറക്ടർ ജ്യോതി പി ബിന്ദു, അഗ്രോ സർവ്വീസ് സെന്റർ പ്രസിഡന്റ് ടി ബി സുനിൽകുമാർ എന്നിവർ പങ്കെടുത്തു.
Share your comments