വികസിത രാജ്യങ്ങളില്‍ കാര്‍ഷിക മേഖലയില്‍ ഡ്രോണുകള്‍ എന്ന് അറിയപ്പെടുന്ന ആളില്ലാ ആകാശയാനങ്ങളുടെ (Unmanned aerial vehicle - UAV) ഉപയോഗിക്കുന്നത് സര്‍വ സാധാരണമാണ്. ഇന്ത്യയിലും വിളകളുടെ സൂക്ഷ്മപരിശോധന നടത്താന്‍ ഡ്രോണുകള്‍ ഉപയോഗിക്കുന്നു. ഇതാണ് പ്രണവ് മണിപ്പൂരിയ എന്ന യുവാവിനെ അമേരിക്കയിലെ ഇല്ലിനിയോസ് സര്‍വകലാശാലയില്‍ നിന്നും ബിസിനസ്സ് അഡ്മിനിസ്‌ട്രേഷന്‍ ബിരുദ പഠന ശേഷം സുഹൃത്തും എഞ്ചിനീയറിംഗ് ബിരുദധാരിയുമായ കുനാല്‍ ശര്‍മയോടൊപ്പം വി.ഡ്രോണ്‍ അഗ്രോ എന്ന കാര്‍ഷിക സാങ്കേതിക വിദ്യാ സംരംഭം ആരംഭിക്കാന്‍ പ്രേരിപ്പിച്ചത്.
വി.ഡ്രോണ്‍ കൃഷിയിടങ്ങളുടെ സൂക്ഷ്മ നിരീക്ഷണത്തിനും,വിളകളുടെ ആദായം, വിളവ് എന്നിവ വര്‍ധിപ്പിക്കുന്നതിന് ,കര്‍ഷകര്‍ക്ക് നിര്‍ദേശം നല്‍കുന്നത്തിനും മറ്റുമായി ഡ്രോണുകള്‍ നിര്‍മ്മിക്കുന്നു.ഡ്രോണ്‍ വിന്യാസനത്തിനായി ഏക്കറിന് 400 മുതല്‍ 800 രൂപവരെയാണ് കര്‍ഷകരില്‍നിന്നും ഈടാക്കുന്നത്.അവര്‍ വികസിപ്പിച്ചിരിക്കുന്ന സോഫ്ട്വെയര്‍ മണ്ണിന്റെ ഫലഭൂയിഷ്ടതയെക്കുറിച്ചും മറ്റും വിശകലനം നടത്തി കര്‍ഷകര്‍ക്കാവശ്യമായ വിവരങ്ങള്‍ നല്‍കുന്നു.
ഈ ഡ്രോണുകള്‍ കര്‍ണാടകത്തില്‍ പരീക്ഷിച്ചു കഴിഞ്ഞുവെന്നും, നാനൂറോളം കര്‍ഷകരാണ് ഇത് ഉപയോഗിച്ചതെന്നും ആന്ധ്രാപ്രദേശിലും ചില കാര്‍ഷിക വ്യവസായങ്ങള്‍ ഇപ്പോള്‍ ഡ്രോണുകള്‍ ഉപയോഗിച്ചുവരുന്നെന്നും മണിപ്പൂരിയ പറഞ്ഞു.
കര്‍ഷകരുടെ ദുരിതങ്ങളെക്കുറിച്ചു കേള്‍ക്കുന്നതില്‍ വിഷമമുണ്ടെന്നും, ഡ്രോണ്‍ സാങ്കേതിക വിദ്യയുടെ സഹായത്തോടു കൂടി കര്‍ഷകരുടെ വരുമാനം വര്‍ധിപ്പിക്കാമെന്നും മണിപ്പൂരിയ പറയുന്നു. ഇന്റര്‍നാഷണല്‍ സെന്റര്‍ ഫോര്‍ എന്റര്‍പ്രെന്യൂര്‍ഷിപ് ആന്‍ഡ് ടെക്‌നോളജിയുടെ (ഐ ക്രീയേറ്റ്) സഹായത്തോടെയാണ് ഇത് വികസിപ്പിച്ചിരിക്കുന്നത്.
Share your comments