രണ്ടാംവിള നെല്ലുസംഭരണത്തിനുവേണ്ടിയുള്ള ഓൺലൈൻ രജിസ്ട്രേഷൻ സപ്ലൈകോ ആരംഭിച്ചു

രണ്ടാംവിള നെല്ലുസംഭരണത്തിനുവേണ്ടിയുള്ള ഓൺലൈൻ രജിസ്ട്രേഷൻ സപ്ലൈകോ ആരംഭിച്ചു. രണ്ടാംവിള ചെയ്ത മുഴുവൻ കർഷകരും ഓൺലൈൻ രജിസ്ട്രേഷൻ നടത്തണമെന്ന് സി.എം.ഡി. അലി അസ്ഗർ പാഷ അറിയിച്ചു.

സപ്ലൈകോയുടെ ഓൺലൈൻ പോർട്ടലിലൂടെയാണ് രജിസ്റ്റർ ചെയ്യേണ്ടത്. ഓൺലൈൻ അപേക്ഷ സമർപ്പിച്ചുകഴിഞ്ഞാൽ പ്രിന്റ് ഔട്ട് എടുത്ത് കൃഷിഭവനിൽ വീണ്ടും സമർപ്പിക്കേണ്ടതില്ല. ഉദ്യോഗസ്ഥർ ആവശ്യപ്പെടുന്നപക്ഷം എല്ലാ രേഖകളും സമർപ്പിക്കണം. പാട്ടമെടുത്ത കർഷകർക്ക് പ്രത്യേക സത്യവാങ്മൂലം സമർപ്പിക്കേണ്ടതില്ല. എന്നാൽ, പാട്ടകൃഷി സംബന്ധിച്ച രേഖകൾ കൃഷിഭവനിൽ സമർപ്പിക്കണം.