ചീര കൃഷി ശ്രദ്ധിക്കേണ്ട രീതി ,വളപ്രയോഗം

വിത്തിന് വലിപ്പം വളരെ കുറവായതിനാൽ പാകി പറിച്ചു നട്ടുവേണം കൃഷി ചെയ്യാൻ.തൈകളുടെ ആവശ്യമനുസരിച്ച് വീഞ്ഞപ്പെട്ടികളിലോ, ചെടിച്ചട്ടികളിലോ തവാരണകൾ നിർമിച്ച് അവയിലോ വിത്തു പാകി കിളിർപ്പിക്കാം. മണ്ണ് നല്ല പോലെ പാകപ്പെടുത്തി അതിൽ വേണം വിത്ത് പാകാൻ. ഒരു മീറ്റർ വീതിയിലും 20-30 സെ.മീറ്റർ പൊക്കത്തിലും വേണം തവാരണകൾ നിർമിക്കാൻ. തവാരണകളുടെ നീളം സൗകര്യം പോലെ നൽകാവുന്നതാണ്. ഒരു ഹെക്‌ടർ പ്രദേശത്ത് നടാൻ ആവശ്യമായ തൈ ലഭിക്കുവാൻ 1.5 മുതൽ 2 കി.ഗ്രാം വരെ വിത്ത് ആവശ്യമായി വരും.

തൈകൾ നടുന്ന രീതിയും വള പ്രയോഗവും

3-4 ആഴ്ച്ച പ്രായമായ തൈകൾ വേണം പറിച്ചു നടാൻ. വരികൾ തമ്മിൽ 30 സെ.മീറ്റർ അകലവും ചെടികൾ തമ്മിൽ 20 സെ.മീറ്റർ അകലവും നൽകണം. 30-40 സെ.മീറ്റർ വീതിയിലും 10-15 സെ. മീറ്റർ താഴ്‌ചയിലും ചാലുകീറി തൈകൾ നടുകയാണ് വേനൽക്കാലത്ത് പതിവ്. വർഷകാലത്ത് 1-1.5 മീറ്റർ വീതിയിലും 20-30 സെ.മീറ്റർ പൊക്കത്തിലും വാരങ്ങൾ നിർമിച്ച് അതിൽ തൈകൾ നടുന്നതാണ് ഉത്തമം. ഹെക്‌ടറിന് 50 ടൺ ചാണകവും 50 : 50 : 50 കി.ഗ്രാം വീതം നൈട്രജൻ, ഫോസ്‌ഫറസ്, പൊട്ടാസ്യം എന്നിവ അടിവളമായും നൽകണം. മേൽവളമായി 50 കി.ഗ്രാം നൈട്രജൻ തവണകളായി നൽകണം. ഓരോ വിളവെടുപ്പിന് ശേഷവും 1% യൂറിയാ ലായനി (10 ഗ്രാം യൂറിയ ഒരു ലിറ്റർ വെള്ളം) തളിക്കുന്നത് ചെടിയുടെ വളർച്ച ത്വരിതപ്പെടുത്തുന്നു.

കളകൾ കൂടെക്കൂടെ നീക്കം ചെയ്യണം. രണ്ടു ദിവസത്തിലൊരിക്കൽ ജലസേചനം നൽകണം. നട്ട് 3-4 ആഴ്‌ച കഴിയുമ്പോൾ ആദ്യത്തെ വിളവെടുപ്പ് നടത്താം. ചുവട്ടിൽ നിന്ന് രണ്ട് മുട്ടുകൾ നീർത്തിയ ശേഷമാണ് ചീര മുറിച്ചെടുക്കേണ്ടത്. 5-8 പ്രാവശ്യം ഇലകൾ അരിയാവുന്നതാണ്.

ഇലചുരുട്ടിപ്പുഴുവിൻ്റെ ഉപദ്രവം ചീരയിൽ സാധാരണയായി കണ്ടു വരാറുണ്ട്. അവയെ നിയന്ത്രിക്കാൻ പുകയില കഷായമോ വേപ്പെണ്ണ ലായനിയോ തയാറാക്കി തളിക്കണം. മാലത്തിയോൺ ഒരു ലിറ്റർ വെള്ളത്തിൽ 2 മി. ലിറ്റർ എന്ന തോതിൽ കലക്കി തളിച്ചും ഇവയെ നിയന്ത്രിക്കാവുന്നതാണ്.