ദിവസവും സൂപ്പ് കഴിച്ചാൽ ഈ ആരോഗ്യഗുണങ്ങൾ നേടാം!

തണുപ്പുകാലങ്ങളിലാണ് പൊതുവെ ആളുകൾ സൂപ്പ് കഴിക്കാൻ ഇഷ്ട്ടപ്പെടുന്നതെങ്കിലും, വേനൽക്കാലങ്ങളിലും സൂപ്പ് കുടിക്കുന്നത് പല ആരോഗ്യഗുണങ്ങളും ലഭിക്കാൻ സഹായിക്കുന്നു.  ഇത് വേഗത്തിൽ ഉണ്ടാക്കാൻ പറ്റുന്നതും  എളുപ്പത്തിൽ ദഹിക്കുന്നതുമായ ഒരു ഭക്ഷണമാണ്.  വേനല്‍ക്കാലത്ത് നിര്‍ജ്ജലീകരണം ഉണ്ടാവുകയുമില്ല. സൂപ്പിൻറെ ആരോഗ്യഗുണങ്ങളും നല്ല ആരോഗ്യത്തിനായി സൂപ്പ് ഉണ്ടാകേണ്ട വിധവും നോക്കാം:

സൂപ്പ് ശരീരത്തിലെ ചൂട് കുറക്കുന്നു.  ഇതില്‍ നന്നായി വേവിച്ച പച്ചക്കറികളും സുഗന്ധവ്യഞ്ജനങ്ങളും നിങ്ങളുടെ ആരോഗ്യത്തിന് വളരെയധികം ഗുണം ചെയ്യുന്നു.  ശരീരത്തില്‍ ജലാംശം നിലനിര്‍ത്താന്‍ സഹായിക്കുന്നു. വേനലിലെ വിയര്‍പ്പിനെ പ്രതിരോധിക്കുന്നതിനും അത് വഴി ഉണ്ടാവുന്ന നിര്‍ജ്ജലീകരണത്തെ ഇല്ലാതാക്കുന്നതിനും സഹായിക്കുന്നു.   ചീരയും മറ്റ് ഔഷധസസ്യങ്ങളും അടങ്ങിയ പച്ചക്കറി സൂപ്പ് കുട്ടികള്‍ക്ക് ആരോഗ്യത്തിന് അത്യുത്തമമാണ്.  

ക്ഷീണത്തെ ഇല്ലാതാക്കുന്നതിനും ഊര്‍ജ്ജവും ആരോഗ്യവും മെച്ചപ്പെടുത്തുന്നതിനും സൂപ്പ് മികച്ചതാണ്. ദിവസവും കുട്ടികള്‍ക്ക് അല്‍പം സൂപ്പ് കൊടുത്താല്‍ അത് നിങ്ങളുടെ കുഞ്ഞിന്റെ ആരോഗ്യം മെച്ചപ്പെടുത്തുകയും പനി, ജലദോഷം പോലുള്ള അസ്വസ്ഥതകള്‍ക്ക് പരിഹാരം കാണുന്നതിന് സഹായിക്കുകയും ചെയ്യുന്നു.

ധാരാളം വിറ്റാമിനുകൾ അടങ്ങിയ സൂപ്പ്, നിങ്ങളുടെ ഭക്ഷണത്തിലെ മുഴുവന്‍ പോഷകങ്ങളും ലഭിക്കുന്നതിനുള്ള ഏറ്റവും നല്ല മാര്‍ഗമാണ്. കാരണം സൂപ്പ് പാചകം ചെയ്യുമ്പോള്‍ പല നിറത്തിലുള്ള പച്ചക്കറികളാണ് ഉപയോഗിക്കുന്നത്. ഇതെല്ലാം തന്നെ വിറ്റാമിന്‍ ബി-കോംപ്ലക്‌സ്, എ, സി, കെ എന്നിവ അടങ്ങിയിട്ടുള്ളതാണ്. ചിലര്‍ ചതകുപ്പ പോലുള്ള പച്ചമരുന്നുകള്‍ ഉപയോഗിക്കുന്നതും സൂപ്പിനെ മികച്ചതാക്കും.

സൂപ്പ് കലോറി കുറവായ ഭക്ഷണമായതുകൊണ്ട് ശരീരത്തിന് ആരോഗ്യകരമായ ഭാരം നിലനിര്‍ത്താന്‍ സഹായിക്കും.