എല്ലാവരുടേയും അടിസ്ഥാന ആവശ്യങ്ങൾ ഉറപ്പാക്കുക ലക്ഷ്യം - കേന്ദ്ര സഹമന്ത്രി ഡോ.എൽ മുരുഗൻ

തിരുവനന്തപുരം: രാജ്യത്തെ ഓരോ കുടുംബത്തിനും ഭവനം, ആഹാരം, ജലം, പാചക വാതക കണക്ഷൻ, ആരോഗ്യ പരിരക്ഷ തുടങ്ങിയവ ഉറപ്പാക്കുകയാണ് കേന്ദ്ര ​ഗവൺമെന്റിന്റെ ലക്ഷ്യമെന്ന് കേന്ദ്ര വാർത്താ വിതരണ പ്രക്ഷേപണ സഹമന്ത്രി ഡോ.എൽ മുരു​ഗൻ പറഞ്ഞു. വികസിത് ഭാരത് സങ്കൽപ്പ യാത്രയുടെ നഗര പര്യടനത്തിന്റെ ഭാ​ഗമായി കോട്ടയം ചിൽഡ്രൻസ് ലൈബ്രറി ഓഡിറ്റോറിയത്തിൽ സംഘടിപ്പിച്ച പരിപാടി ഉദ്ഘാടനം ചെയ്യുകയായിരുന്നു അദ്ദേ​ഹം.

സ്ത്രീകൾക്ക് 33% സംവരണം നരേന്ദ്ര മോദി ​ഗവൺമെന്റ് പ്രാവർത്തികമാക്കി. സ്വാതന്ത്രത്തിന്റെ നൂറാം വാർഷികത്തിൽ ഭാരതം മറ്റ് രാജ്യങ്ങൾക്ക് വഴി കാട്ടിയാകുന്നതിന് വനിതകൾ, ദളിതർ, യുവാക്കൾ, കർഷകർ എന്നീ നാല് ശക്തികൾ സജ്ജമാകണമെന്നും ശ്രീ എൽ മുരു​ഗൻ ആഹ്വാനം ചെയ്തു.

എസ്ബിഐ റിജിയണൽ മനേജർ ഡോ. അനിത, എസ്ബിഐ ചീഫ് മാനേജർ  ശ്രീ രാഹുൽ, സെൻട്രൽ ബ്യൂറോ ഓഫ് കമ്മ്യൂണിക്കേഷൻ, ഡയറക്ടർ ശ്രീമതി വി.പാർവ്വതി, നബാർഡ് എ ജിഎം ശ്രീ റജി വർഗീസ്‌, തപാൽ വകുപ്പ്  സീനിയർ സൂപ്രണ്ട്‌ ശ്രീ രാഹുൽ തുടങ്ങിയവർ ചടങ്ങിൽ സന്നിഹിതരായിരുന്നു. വിവിധ കേന്ദ്ര പദ്ധതികളുടെ സമ്മതപത്ര വിതരണവും, സെമിനാറുകളും, കേന്ദ്രസർക്കാർ വകുപ്പുകളുടെ സേവനങ്ങളും പരിപാടിയിൽ ഉൾപ്പെടുത്തിയിരുന്നു. മേരി കഹാനി മേരി സുബാനി പരിപാടിയുടെ ഭാ​ഗമായി ​ഗുണഭോക്താക്കൾ അനുഭവങ്ങൾ പങ്കുവെച്ചു.

കോട്ടയം നാഗമ്പടം വൈപ്രറ്റ് സ്റ്റാന്റിനടുത്ത് സംഘടിപ്പിച്ച വികസിത് ഭാരത് സങ്കൽപ്പ യാത്ര പരിപാടിയും  കേന്ദ്ര സഹമന്ത്രി ഡോ.എൽ മുരുഗൻ ഉദ്ഘാടനം ചെയ്തു. യുവജനങ്ങൾക്ക് സംരംഭം ആരംഭിക്കുന്നതിന് കേന്ദ്ര ​ഗവൺമെന്റ് 100% ഗ്യാരന്റി നൽകുന്നുണ്ടെന്ന് അദ്ദേഹം പറഞ്ഞു. 2014-ൽ 400 സ്റ്റാർട്ടപ്പ് കമ്പനികൾ മാത്രം ഉണ്ടായിരുന്ന ഇന്ത്യയിൽ നിലവിൽ ഒരു ലക്ഷത്തിലധികം സ്റ്റാർട്ടപ്പുകളാണ് പ്രവർത്തിക്കുന്നത്. ഇവയുടെ സി ഇ ഒ മാരെല്ലാം മുപ്പത് വയസിൽ താഴെയുള്ളവരാണെന്നും ശ്രീ എൽ മുരു​ഗൻ പറഞ്ഞു. ചടങ്ങിൽ സങ്കൽപ്പ് പ്രതി‍‍ഞ്ജയും എടുത്തു.

കേന്ദ്ര പദ്ധതികളുടെ ആനുകൂല്യങ്ങൾ എല്ലാ ഗുണഭോക്താക്കളിലേക്കും സമയബന്ധിതമായി എത്തിച്ചേരുന്നുവെന്ന് ഉറപ്പാക്കുന്നതിലൂടെ ഗവൺമെന്റിന്റെ മുൻനിര പദ്ധതികളുടെ പരിപൂർണത കൈവരിക്കുക എന്ന ലക്ഷ്യത്തോടെയാണ് രാജ്യത്തുടനീളം ‘വികസിത് ഭാരത് സങ്കൽപ്പ് യാത്ര’ നടക്കുന്നത്.