വിത്തുകായ്കൾ ശേഖരിക്കുവാൻ ഉദ്ദേശിക്കുന്നുവെങ്കിൽ മാതൃവൃക്ഷം തിരഞ്ഞെടുക്കുമ്പോൾ പ്രത്യേകം ശ്രദ്ധിക്കണം

കൊക്കോ ഒരു ദീർഘകാല വിളയായതിനാൽ ഗുണമേന്മയുള്ള നടീൽ വസ്തുക്കൾ വേണം ഉപയോഗിക്കുവാൻ. സ്വന്തം തോട്ടത്തിൽ നിന്നും വിത്തുകായ്കൾ ശേഖരിക്കുവാൻ ഉദ്ദേശിക്കുന്നുവെങ്കിൽ മാതൃവൃക്ഷം തിരഞ്ഞെടുക്കുമ്പോൾ പ്രത്യേകം ശ്രദ്ധിക്കണം

മാതൃവൃക്ഷങ്ങൾ തിരഞ്ഞെടുക്കുമ്പോൾ ഉണ്ടായിരിക്കേണ്ട ഗുണങ്ങൾ

1. ഫോറസ്റ്റിറോ ഇനത്തിൽപ്പെട്ട മരങ്ങളിൽ ഉണ്ടാകുന്ന 350 ഗ്രാമിൽ കുറയാത്ത ഭാരമുള്ളതും വിളയാത്ത കായ്കൾക്കു പച്ചനിറമുള്ളതും മൃദുത്വമേറിയതും അധികം ആഴമില്ലാത്ത ചാലുകൾ ഉള്ളതുമായ പുറന്തോടോടു കൂടിയതുമായ കായ്കൾ.

2. വർഷം തോറും 100 കായ്കളിൽ കുറയാത്ത ഉത്പാദനം. 3. ഓരോ കായിലും 35 എണ്ണത്തിൽ കൂടുതൽ വിത്തുകൾ.

4. ഉണങ്ങിയ ഓരോ കുരുവിനും ഒരു ഗ്രാമിൽ കൂടുതൽ തൂക്കം. 5. കായ്കളുടെ പുറന്തോടിന് ഒരു സെ.മീറ്ററിൽ കൂടുതൽ കനം ഉണ്ടായിരിക്കരുത്.

6. ഒരു കി.ഗ്രാം പച്ചക്കുരു ലഭിക്കാൻ 12 കായ്കളിൽ കൂടരുത്. തിരഞ്ഞെടുത്ത മാതൃവൃക്ഷത്തിൽനിന്നും കായ്കൾ പഴുത്തു തുടങ്ങിയാലുടൻ ശേഖരിക്കാം. കായ്കൾ പൊട്ടിച്ചു കഴിഞ്ഞാൽ ഉടൻ തന്നെ പാകുന്നതാണ് ഏറ്റവും നല്ലത്.

പോളി ബാഗുകളിൽ ആറ്റുമണ്ണ്, ചെമ്മണ്ണ്, ഉണക്കിപ്പൊടിച്ച ചാണകം എന്നിവ 1:1:1 എന്ന അനുപാതത്തിൽ കൂട്ടി കലർത്തി നിറച്ച് കൊക്കോക്കുരു പാകാം. 1-2 സെ. മീറ്ററിൽ കൂടുതൽ ആഴത്തിൽ വിത്തുകൾ താഴ്ന്നു പോകാതിരിക്കാൻ പ്രത്യേകം ശ്രദ്ധിക്കണം. ആവശ്യാനുസരണം ജലസേചനം നടത്തണം. വിത്തു മുളച്ച് മൂന്നുമാസം കഴിയുമ്പോൾ വളർച്ച അനുസരിച്ച് തൈകളെ തരം തിരിക്കണം. ഏകദേശം 25% ചെടികൾ ആരോഗ്യം കുറഞ്ഞവയായിരിക്കും. ഇവ നടാൻ പാടില്ല.

കാർഷിക സർവ്വകലാശാലയിൽ നടത്തിയ ഗവേഷണഫലങ്ങൾ സൂചിപ്പിക്കുന്നത് വിത്തുപാകി മുളപ്പിക്കുന്ന ചെടികളേക്കാൾ കൂടുതൽ ഉത്പാദനക്ഷമത ബഡ്ഡ് ചെയ്ത ചെടികൾക്കാണെന്നാണ്